ગુજરાતમાં જ્યારે રાજકારણ કરવાનું હતું ત્યારે એક નહીં પરંતુ બે વખત મુખ્યમંત્રી બદલાયા હતા - ગૌરવ ગોગોઈ

ગુજરાતમાં જ્યારે રાજકારણ કરવાનું હતું ત્યારે એક નહીં પરંતુ બે વખત મુખ્યમંત્રી બદલાયા હતા – ગૌરવ ગોગોઈ

મણિપુર હિંસા પર કેન્દ્ર સરકાર વિરુદ્ધ અવિશ્વાસ પ્રસ્તાવ પર આજે બપોરે 12 વાગ્યાથી લોકસભામાં ચર્ચા શરૂ થઈ હતી. સ્પીકર ઓમ બિરલા પોતાની સીટ પર બેઠા કે તરત જ હોબાળો શરૂ થઈ ગયો.

ભાજપના સાંસદોએ કહ્યું- સવારે સેક્રેટરી જનરલને પત્ર આવ્યો હતો કે રાહુલ ગાંધી બોલશે. અમે તેમના ભાષણની રાહ જોઈ રહ્યા છીએ. હવે ગૌરવ ગોગોઈ બોલી રહ્યા છે. 5 મિનિટમાં શું થયું? આ પહેલા સવારે 11 વાગે લોકસભાની કાર્યવાહી શરૂ થતાં જ તેને બપોરે 12 વાગ્યા સુધી સ્થગિત કરી દેવામાં આવી હતી.

સંસદના ચોમાસુ સત્રનો આજે (8 ઓગસ્ટ) 14મો દિવસ છે. લોકસભાની કાર્યવાહી શરૂ થતાં જ વિપક્ષે હોબાળો મચાવ્યો હતો. હોબાળાને કારણે 12 વાગ્યા સુધી કાર્યવાહી સ્થગિત કરી દેવામાં આવી હતી. 12 વાગ્યે લોકસભાની કાર્યવાહી ફરીથી શરુ કરવામાં આવી છે.

લોકસભામાં મણિપુર હિંસા અંગે કેન્દ્રની મોદી સરકાર વિરુદ્ધ લાવવામાં આવેલા અવિશ્વાસ પ્રસ્તાવ પર ચર્ચા ચાલી રહી છે. 2014 પછી આ બીજી વખત છે જ્યારે મોદી સરકાર વિરુદ્ધ અવિશ્વાસ પ્રસ્તાવ લાવવામાં આવ્યો છે.આ ચર્ચા ત્રણ દિવસ સુધી ચાલશે. વડાપ્રધાન નરેન્દ્ર મોદી ચર્ચાના છેલ્લા દિવસે 10 ઓગસ્ટે પોતાનો જવાબ આપી શકે છે. પીએમ મણિપુર હિંસા તેમજ અન્ય મુદ્દાઓ પર બોલી શકે છે.

રાજ્યસભામાં પણ વિપક્ષના સાંસદોએ હોબાળો મચાવ્યો હતો. TMCના રાજ્યસભા સાંસદ ડેરેક ઓ બ્રાયન સ્પીકર જગદીપ ધનખડની સામે સૂત્રોચ્ચાર કરી રહ્યા હતા. તેમને સમગ્ર સત્ર માટે સસ્પેન્ડ કરવામાં આવ્યા છે.

ગૌરવ ગોગોઈએ ઉઠાવ્યા 3 સવાલ

1. વડાપ્રધાન મોદી મણિપુર કેમ ન ગયા. રાહુલ ગયા, I.N.D.I.A.ના સાંસદ ગયા, ગૃહમંત્રી ગયા.

2. મણિપુર પર બોલવામાં 80 દિવસ કેમ લાગ્યા. જો તમે બોલ્યા, તો માત્ર 30 સેકન્ડ માટે બોલ્યા. આજ સુધી સહાનુભૂતિના કોઈ શબ્દો પણ વ્યક્ત કરવામાં આવ્યા નથી. વડાપ્રધાનના શબ્દોનું મહત્વ કોઈ મંત્રીના શબ્દોમાં નથી હોતું. પીએમ શાંતિ માટે પગલા ભરવાની પહેલ કરે તો સારું, મંત્રીના પગલામાં કોઈ તાકાત હોતી નથી.

3. મણિપુરના મંત્રીને કેમ હટાવાયા નથી. ગુજરાતમાં જ્યારે રાજકારણ કરવાનું હતું ત્યારે એક નહીં પરંતુ બે વખત મુખ્યમંત્રી બદલાયા હતા. ઉત્તરાખંડમાં, ત્રિપુરામાં 3 વખત બદલાયા. મણિપુરના સીએમ માટે શું ખાસ આશીર્વાદ છે, જેઓ પોતે કબૂલ કરે છે કે ઈન્ટેલિજેનેસની નિષ્ફળતા હતી.

મણિપુર પર બોલવામાં 80 દિવસ કેમ લાગ્યા?
ગૌરવ ગોગોઈએ સવાલ ઉઠાવ્યો કે વડાપ્રધાન નરેન્દ્ર મોદી મણિપુર કેમ ન ગયા. મોદીજીને મણિપુર પર બોલવામાં 80 દિવસ કેમ લાગ્યા? શા માટે પીએમ મોદી તરફથી કોઈ શોક કે શાંતિની અપીલ કરાઈ ન હતી? અમારો ત્રીજો સવાલ એ છે કે પીએમએ મણિપુરના મુખ્યમંત્રીને કેમ હટાવ્યા નથી. ગુજરાતમાં ચૂંટણી અગાઉ બે વખત મુખ્યમંત્રી બદલાયા હતા, ઉત્તરાખંડ અને ત્રિપુરામાં પણ મુખ્યમંત્રી બદલાયા હતા. પરંતુ મણિપુરના મુખ્યમંત્રીને ખાસ આશીર્વાદ શા માટે?

ગૌરવ ગોગોઈએ કહ્યું- વડાપ્રધાન મોદી મણિપુર કેમ ન ગયા

ગૌરવ ગોગોઈ: શું મોકલવામાં આવ્યું હતું, શું કહેવામાં આવ્યું હતું, શું અમે એવું કહીએ કે વડાપ્રધાને તમારી ઓફિસમાં શું કહ્યું?

બીજેપી સાંસદે કહ્યું- આ અધ્યક્ષ અને વડાપ્રધાનનું ઘોર અપમાન છે. તમારે જણાવવું જોઈએ

સ્પીકર: મારું ચેમ્બર પણ ગૃહ છે. આવી ટિપ્પણીઓ ન કરવી જોઈએ, જેની પાછળ કોઈ તથ્ય ન હોય.

ભાજપ સાંસદ: અમે જે કહ્યું તે જાહેરમાં કહ્યું છે. તેમણે પ્રેસમાં કહ્યું કે રાહુલ ગાંધી બોલશે. તમે ગમે તેવા આરોપ ન લગાવો.

PM નરેન્દ્ર મોદીએ ભાજપ સંસદીય દળની બેઠકમાં કહ્યું- જે લોકો સામાજિક ન્યાયની વાત કરે છે, તેમણે જ પરિવારવાદ, ભ્રષ્ટ નીતિઓના કારણે સૌથી વધુ નુકસાન પહોંચાડ્યું છે.

વિપક્ષ ગઠબંધન I.N.D.I.A વતી કોંગ્રેસ સાંસદ ગૌરવ ગોગોઈએ 26 જુલાઈના રોજ મોદી સરકાર વિરુદ્ધ આ પ્રસ્તાવની નોટિસ આપી હતી, જેને લોકસભા સ્પીકર ઓમ બિરલાએ સ્વીકારી લીધી હતી.

રાહુલ ગાંધી કોંગ્રેસ પક્ષમાંથી આ ચર્ચાની શરૂઆત કરી શકે છે. મોદી સરનેમ સાથે જોડાયેલા માનહાનિ કેસમાં સુપ્રીમ કોર્ટમાંથી રાહત મળ્યા બાદ સોમવારે (7 ઓગસ્ટ) તેમના લોકસભા સભ્યપદ પુનઃસ્થાપિત કરવામાં આવ્યું હતું. રાહુલ 137 દિવસ બાદ સંસદ પહોંચ્યા હતા.

અવિશ્વાસની દરખાસ્ત લાવવાનું કારણ
લોકસભામાં સરકાર પાસે બહુમતી છે કે નહીં તે ચકાસવા માટે અવિશ્વાસ પ્રસ્તાવનો નિયમ બનાવવામાં આવ્યો છે. કોઈપણ સરકાર સામે અવિશ્વાસ પ્રસ્તાવ લાવી શકાય છે. તેને પસાર કરવા માટે, લોકસભામાં હાજર રહેલા અને મતદાન કરનાર કુલ સાંસદોના 50% થી વધુ મતની જરૂર છે.

અવિશ્વાસ પ્રસ્તાવ શું છે?
લોકસભા દેશની જનતાનું પ્રતિનિધિત્વ કરે છે. જનતાના ચૂંટાયેલા પ્રતિનિધિઓ અહીં બેસે છે, તેથી સરકાર પાસે આ ગૃહનો વિશ્વાસ હોવો જરૂરી છે. આ ગૃહમાં બહુમતી હોય તો જ સરકારને સત્તામાં રહેવાનો અધિકાર છે.